آستۊن لٛۏرسوݩ( وه فارسی: استان لرستان) ۉ همچنیݩ، LURISTAN ، LURESTAN ، LORISTAN نوشته مۊئٱ، آستونؽ د ٱفتاونشیݩ ولات اؽروݩ د کۏیا زاگروس. نفۊس آستوݩ لٛۏرسوݩ د سال ۲۰۰۶, ۱/۷۱۶/۵۲۷ نفر برآورد بیٱ. د سال ۲۰۱۴ جۏز راساگه(منطقه) ۴ اؽروݩ بیٱ. جاگپی آستوݩ لٛۏرسوݩ ۲۸/۳۹۲ کیلٛۊمتر ٱ. شٱئرؽا مهم اؽ آستوݩ, خورموئٱ، ورۊگرد، ٱلٛیگۊدرز، دورۊد، کۊدٱشت، ٱزنا، ٱلٛؽشتر، نۊرآباد ۉ پلدختر هؽسن.
نوم لٛۏرسوݩ وه معنی ولات لٛۏرؽا ئٱ. وه معنی گپتر د ورگرتٱ قٱلؽ د ٱفتاونیشݩ ایران هومبراور وا آستوݩ پشتکۊه لٛۏرسوݩ(ایلٛام). ۉ جاگپی نزیک۶۵۰ کیلٛۊمتر د لٛا شمال ٱفتاونشیݩ ۉ ٱفتاوزنوݩ د کرماشو تا فارس وا عرض ۱۸۰_۱۵۰ کیلٛۊمتر. اؽ وارگٱ بؽشتر شامل کۏیا فراٛ یٱ که قٱلؽ د رشتٱ کۏیا زاگروس ٱن کاْ د شمال ٱفتاونشیݩ ولٛا ٱفتاوزنوݩ کشسٱ. وارگٱ مؽنجاییش بلنڳیا فراٛ دارٱ که همیشٱ تقریبن پۊشسٱ د برفن. وا رۏتر د ۴۰۰۰ متر ۉ بؽشتر.
اؽ وارگٱ سرچشمٱ فراٛ د گلالؽا موهم اؽروݩ ئٱ چی: زایندٱ رۊد،جراحی، کارۊن، دز، کرخٱ. محدۊده یا رۏتر د دشتؽا حاصلخیز ۉ تپٱیا فرٱ ۉ وارگٱیا آو حردنی پۊشسٱ بيٱ. بلنڳتریݩ نۏقتاٛ آستوݩ لٛۏرسوݩ قلٛٱ اشترانکۏ وبلنڳی ۴۰۵۰ مترٱ. نمتریݩ نۏقتٱش د جنۊبی تریݩ نۏقتاٛ آستوݩ ئٱ. تقریبٱن ۵۰۰ متر رۏتر د ری دریا. پاسارٱیاش پوشسٱ د جنگٱلؽا بٱلٛی وا نارون، ٱفرا، گردکوݩ، بايم هؽسن. ٱفتاونشیݩ لٛۏرسوݩ شامل یاٛ سلسلٱ درٱدۊلؽا همیشٱ حاصلخیز د مؽن کۏیا زاگرۏسٱ. پوشتکۏ وارگاٛ ئٱ د دامنٱیا ٱفتاونشیݩ رشتٱ کۏ کۉئر. پؽشکۏ ها د ٱفتاوزنوݩ کۉئر.
اؽی وارگٱ د تۊل ٱوایل عصر مفرغ تا نیماٛ قرن سئم هزارٱ نوئا زارۊ زهشتگٱ آیمؽا بیٱ. د لٛحاظ آو ۉ هوایی اؽی آستوݩ وساْ قٱل تقسیم مۊئٱ. وارگٱیا کۏئسونی وا زمسوݩ سرد ۉ توئسوݩ معتدل د قبیلٛ: ورۊگرد، دورۊد، ٱزنا، نۊرآباد، ٱلٛؽشتر. د وارگٱ مؽنجایی فصل بهار د مؽنجا فوریٱ تا مؽنجا ماٛ طۊل مؽکشٱ. شٱئرسوݩ خورموئٱ ها د اؽی وارگٱ. وارگٱیا هارگٱ د قبیلٛ پلدوختر ۉ پاپی تٱئت تاثیر جریان آو ۉ هوایی گرم خۊزسوݩ نٱن کاْ توئسونؽا گرم ۉ زمسونؽا نسبتٱن موتٱدل دارن. اْقلٛیمش عمۊمن قاراٛیی مرطوب وا بارش زمسونی کاْ بؽشتر برف ٱ.
سی یٱ کاْ د مؽن دامنؽا ٱفتاونشیݩ زاگروس ۉ هارگٱ کۏیا ٱلبرز قرار گرتٱ بارش سالونٱ اؽ آستوݩ بؽشتر د هر جا ایران ٱ. د خورموئٱ مؽنجا سالونٱ بارشؽا (۲۱اینچ) ۵۳۰ میلٛیمتر ٱ. د حالؽ کاْ ممکنٱ د بلنڳیا کۏئسونی رۏتر د (۵۰اینچ) ۱۲۷۰ میلٛیمتر بۊئٱ. ماه ژوئن تا سپتامبر معمۊلن کاملن هۏشک هؽسن. ولی مۊئٱ انتظار داشت کاْ خورموئٱ 4 اینچ بارندگی د دسامبر ۉ ژانویٱ داشتۊئٱ.د اؽی فٱسل آلشت دما فراٛ مابؽن شۉ ۉ رۊز هؽ. وتۉر نمۊنٱ د خورموئٱ دٱما توئسوݩ حدودا حداقلش (۵۰فارنهایت) ۱۲ گرینج سانتیگراد تا حداکثر دما (۹۰ فارنهایت) ۳۲ گرینج سانتیگراد هؽ. د زمسوݩ اؽی حدود حداقل (۲۸ فارنهایت) ۲- گرینج سانتیگراد تا حداکثر (۴۶ فارنهایت) ۸ گرینج سانتیگراد.