زوݩ انڳلٛیسی یکی د زونیٛا هند ۉ اورۊپایی ئه که د تال جرمنی ئٱ. جرمنی خوش بٱئر بیٱ د دۏ کوت ٱفتاوزنوݩ ۉ ٱفتاونشیݩ. بوئٱ انڳلٛیسی هند ۉ اۊرپایی ٱفتاونشیݩ ئٱ. ایٛ زوݩ د انڳلٛیسی ۉ هارگٱ(جنوب) ٱفتازنوݩ اسکاتلٱند کامل بیٱ. چنتا د زونیٛا هنی تال جرمنی: آلمانی، هلندی، دانمارکی، سوئدی ۉ نوروژی ئٱن. ایسنیٛا نزیک وه نصمی د کٱلیمٱیا ۉ دستۊر زوݩ انڳلٛیسی ریشٱ جرمنی دارن ۉ بورؽ هنی نه کلیمه یا عارؽتی دۏرس میٛکٱ. بیٛشتر ایٛ واجه یا د زوݩ لٛاتین، فرانسه ایی، کوتؽ هنی د یۊنانی ۉ زونیٛا هنی اومائنٱ د زون انڳلٛیسی. زوݩ انڳلٛیسی دماتری فرٱ چی زوݩ آلمانی بیٱ. سی یٱ که انڳلٛیسی زونیٛا بیٛشتر د لٛوݩ(نژاد) جرمنی بینٱ که د آلمان رتنٱ بریتانیا ۉ مۊئٱ بۉیی زوݩ آلمانی زوݩ دا زوݩ انڳلٛیسی ئٱ.
سی کارگرایی وارۉ سامونکاری، اومۊری(اقتصادی)، دونسمنی(علمی)، سؽاسی ۉ رهزیشتی(فرهنگی) بریتانیا ری دۏنیا دما د سدٱ هیژدئم ۉ کارگرایی ولاتچٱیا یکاگرتٱ اْمریکا د سدٱ بیسم وه ایلٛا، ایٛ زوݩ د گرد دۏنیا گپ کلوݩ بی ۉ بی وه زوݩ دۏئم دۏنیا، زوݩ میٛنجاکار(واسطه) ۉ زوݩ جاونه د کولٛ دۏنیا د گات ایسنی زوݩ انڳلٛیسی بیٱ.
زوݩ انڳلٛیسی وا داسوݩ زوݩ داواری(مادری) د ولاتیٛا انڳلٛیس، اْمریکا، کانادا، استرالٛیا، ایرلند، نیۊزیلند، اْفریقا هارگٱ(جنوبی)، غنا فرٱ د ولاتیٛا هنی کارگرایی دارٱ. ایساْ د دیجا شمارٱ هچایه کار، دماتر د چینی ۉ اْسپانیایی، سئمی زوݩ دۏنیا ئٱ. شمارٱ کسونؽ کاْ زوݩ داواریشو انڳلٛیسی ئٱ تا ایساْ ۳۸۰ ملٛیوݩ کٱس ئٱ. انڳلٛیسی د ولاتیٛا فراٛیؽ زوݩ منجیگر ئٱ ۉ نازارتریݩ زوݩ دۊنیا د شؽواتیٛا سؽاسی، اومۊری، سامونکاری، کسم ۉ کار، رهزیشتی د جا وه جا کاری رهزیشتی مێنجا زایاراٛیی ئٱ.
چنتا کلیمه انڳلٛیسی وا هومبراور(معنی) لٛۏری House=مالگٱ،هونٱ Room=تۉ Sparrow=ملٛیچک After Noon=اؽواره Yellow=هیلٛ Red=سۏر Black=سؽ Eye=تیٱ،چش Nose=پت،نفت Foot=قولٛ،لٛنڳ Crazy=لٛؽوه،شؽت Stupid=چاٛل
