هندۊیسم یا هندۊتوا یاٛ دین ۉ مذهبه کاْ جاگٱ و دیر اومایئنش ولات هند بیٱ اؽ دین سئمیݩ دین نها دین مسیحیت ۉ اْسلامٱ کاْ کسونؽا فراٛ هان د اؽ دین، اؽ دین د نوم گلال سند گرتٱ بیٱ اؽرونیا دماتر وه ولاتؽا لٛا گلال سند مؽ گوتنٱ هند ۉ اؽ راساگٱ جاگٱ و دیر اومایئن شٱئرآویشتٱیا گٱپؽ چی موهنجودارو ۉ هاراپا بیٱ کاْ د گات خوشو اْمپراتۊرؽا ۉ شایا فرٱ گپؽ بینٱ، ٱولیݩ گلٛ اْسکیلاکس کاْ رٱتٱ بی تلکستن ۉ ٱنازٱ دؽاری کردن اؽ گلال کلیمه هندوس ناْ سی اؽ گلال و کار گرتٱ. د او گات و نوئا ۉ د گات اْسلامی، نوم هندۊ د اؽ راساگٱ ۉ کولٛ ولات هند ۉ دین زایاراٛ هند و کار گرتٱ بیٱ ۉ خود ایسجایا ولات هندۊسوݩ و خوشو مؽگوتنٱ هندۊ، هشتاد درصد د نفۊس ولات هند دین هندۊ دارٱن ۉ نزیک و سی ملٛیوݩ کس کاْ دینشو هندۊ ئه هان و در د ولات هند. قرؽ د دین شناسؽا مۉئٱن کاْ کلیمه هندۊیسم وا کلیمه درتیچ کاری سی دین هندۊ فرٱ فرق دارٱ. هندۊیسم یا هندۊتوا یاٛ کیلمه کاْ د ور گرتٱ کولٛ رسم ۉ رسۊمات زیشت هندۊیائٱ کاْ وا اؽ هومبروئٱری سوزی اؽ کلیمه د ور گرتٱ دین هندۊ هم هؽ. خوداْ هندۊیا د چٱن تا خودا ،خودا یٱکونٱ ناْ باور دارن ولی د گاتؽ کاْ کلیمه هندۊیسم و کار گرتٱ مۊئٱ یٱکؽ د مانؽاش چن خدایی ۉ چن ربی بی ینٱ، یعنؽ چنی مۊئٱ بۉیی کاْ هندۊیسم بؽشتر ها د پایٱ کردار تا باور. هندۊیسم سی یٱ کاْ یاٛ کتاو مقدس ۉ خۊ نارٱ، نمؽتونٱ ماباٛن دیندارۉ بؽ دین فرق بنؽٱ. وا اؽ هومبراوری سوزی مۊئٱ بۉیی کاْ هندۊیسم بؽشتر یاٛ روش زیشتٱ تا یاٛ دین ۉ مذهب خاص، اؽ دین د باورؽا هندۊیا فرٱ آزادی راس کردٱ چنی کاْ خوشونم سی دیارکاری رٱ دۏرس هان د شئک، اؽ دین ریشٱ د آئین ودایی هند دمادار دارٱ.
باورؽا
اصول دین هندۊ اتقات ۉ حرمت نیایݩ و کتاویا دمادار ۉ سنتیا دینی براٛهمٱنیا ۉ پرستش خودایاؽ کاْ هندۊیا د دیارجایی ونو د گات دماتری اتقات دارٱن. اؽ دین و بؽشت ۉ جٱنم ٱتقات نارٱ د اؽ لٛاز مۊئٱ بۉیی کاْ دقیقن ها د ری و ری دینؽا ابروهیمی چی اْسلام ۉ جیدیٱت، اتقات د تناسخ نوئا د دۏنیا رٱتن چن تا د باورؽا نازار ۉ اصلی اؽ دینن، و ویر آوردن دسٱ یا کوملٱ یٱکؽ د زٱن هاستن ۉ حرمت نیاین و هر چؽ کاْ زیشت دارٱ ۉ مخصوصا کاْ د اؽ دین نشودیارکن حاصلخیزی زمینٱ د لٛا هندۊیا فرٱ نازارن. کلیمه هم د زوون سانسکریت کاْ هومبراور لٛۏریش هاٛ او آمینٱ یاٛ کلیمه مقدس د اؽ دینٱ ۉ مۊئٱ بۉیی کاْ وا کلیمه یٱهووٱ د دین جید یٱکؽٱ. وا یٱ کاْ دین هندۊ فرٱ لٛٱشکۉ بار دارٱ وٱلٛی د مؽنجا اؽ لٛٱشکؽا چن تا چی یٱکونان:کارما، دارما، تناسخ ۉ رستگاری کاْ ینو مٱفۊمؽا ٱسلی د زیشت هندۊیان. د باور هندۊیا یاٛ رۊه یٱکا مؽنجا دۏنیایی هؽ کاْ مؽنجا هندۊیا وا نوم برهمن نوم دیارٱ ۉ هر آیم زمینی یاٛ رۊه خودایی(آتمان) دارٱ کاْ ریشٱ گرتٱ د برهمنٱ ۉ وٱ یکؽٱ. د دین هندۊ برهمن دۏ شؽوٱ دارٱ:نیرگونا برهمن ۉ سگونا برهمن، نیرگونا برهمن اصلی ناْ دیارکاری مؽکٱ ۉ مۉئٱ کاْ برهمٱن اصلی وارۏتر د حس آیمیائٱ ۉ نیرگونا برهمن ناْ وا دیدجا آیم دیارکاری مؽکٱ. دین برهمایی ساْ تا خودا پؽا ۉ ساْ تا خدا زن دارٱ، کاْ خدایا نٱرینٱ ینونن:برهما، ویشنو ۉ شیوا اۊساْ خودایا زن ینونن: پارواتی، دوی ۉ لاکشمی.
oدایا
براهما مۊئٱ و آفرینشتکار، ویشنو مۊئٱ و وادار، شیوا واجوکوکار کائنات ساْ تا خدا د دین هندۊ ئن. هومسر براهما ساراسواتی، خودا دونسمنی ۉ هونرٱ. هومسر شیوا، پارواتی خودا آزٱ. لاکشمیم خودا پیلٛ ۉ مالداریٱ ۉ هر آیمؽ اؽ ساْ چی ناْ مؽها. چن تا د خدایا نوم دیار هندۊیسم ینونن:
ٱگنی (Agni) یعنؽ تٱش؛
وارۊنا (Varuna) یعؽ آسموݩ؛
ایشوارا (Isvara) یعنؽ قادر متعال؛
رۊردا (Rurdra) یعنؽ بٱر دار؛
راما (Rama) یعنؽ هاستنی؛
کریشنا (Krishna) یعنؽ آوی سؽر؛
یاما (Yama)
ٱشوین (Asvin) یعنؽ ٱسب سوار.
