زڤوݩ اْنڳلٛیسی یٱکی د زڤونیٛا هند ۉ اورۊپایی ئٱ کاْ د تال جرمٱنی ئٱ. جرمٱنی خوش بٱئر بیٱ د دۏ کوت ٱفتاوزنوݩ ۉ ٱفتاونشیݩ. بوئٱ اْنڳلٛیسی هند ۉ اوۊرپایی ٱفتاونشیݩ ئٱ. ایٛ زڤوݩ د اْنڳلٛیسی ۉ هارگٱ ٱفتازنوݩ اْسکاتلٱند کامل بیٱ. چٱنتا د زڤونیٛا هنی تال جرمٱنی: آلمانی، هولٱندی، دانمارکی، سوئدی ۉ نورڤژی ئٱن. ایسنیٛا نزیک ڤ نسمی د کٱلیمٱیا ۉ دٱستۊر زڤوݩ اْنڳلٛیسی ریشٱ جرمٱنی دارٱن ۉ بورؽ هنی ناْ کٱلیمٱیا عارؽٱتی دۏرس میٛکٱ. بیٛشتر ایٛ ڤاجٱیا د زڤوݩ لٛاتین، فرانساٛیی، کوتؽ هنی د یۊنانی ۉ زڤونیٛا هنی اوماینٱ د زڤون اْنڳلٛیسی. زڤوݩ اْنڳلٛیسی دماتری فرٱ چی زڤوݩ آلمانی بیٱ. سی یٱ کاْ اْنڳلٛیسی زڤونیٛا بیٛشتر د لٛوݩ جرمٱنی بینٱ کاْ د آلمان رٱتنٱ بریتانیا ۉ مۊئٱ بۉیی زڤوݩ آلمانی زڤوݩ دا زڤوݩ اْنڳلٛیسی ئٱ.

سی کارگرایی ڤارۉ سامونکاری، اومۊری، دونسمٱنی، سؽاسی ۉ رٱهزیشتی بریتانیا ری دۏنیا دما د سدٱ هیژدٱئم ۉ کارگرایی ڤلاتچٱیا یٱکاگرتٱ اْمریکا د سدٱ بیسم ڤ ایلٛا، ایٛ زڤوݩ د گرد دۏنیا گٱپ کلوݩ بی ۉ بی ڤ زڤوݩ دۏئم دۏنیا، زڤوݩ میٛنجاکار ۉ زڤوݩ جاڤٱنٱ د کولٛ دۏنیا د گات ایسنی زڤوݩ اْنڳلٛیسی بیٱ.

زڤوݩ اْنڳلٛیسی ڤا داسوݩ زڤوݩ داڤاری د ڤلاتیٛا اْنڳلٛیس، اْمریکا، کانادا، اوسترالٛیا، ایرلٱند، نیۊزیلٱند، اْفریقا هارگٱ، غنا فرٱ د ڤلاتیٛا هنی کارگرایی دارٱ. ایساْ د دیجا شمارٱ هٱچایٱکار، دماتر د چینی ۉ اْسپانیایی، سئمی زڤوݩ دۏنیا ئٱ. شمارٱ کٱسونؽ کاْ زڤوݩ داڤاریشو اْنڳلٛیسی ئٱ تا ایساْ ۳۸۰ ملٛیوݩ کٱس ئٱ. اْنڳلٛیسی د ڤلاتیٛا فراٛیؽ زڤوݩ منجیگر ئٱ ۉ نازارتریݩ زڤوݩ دۊنیا د شؽڤاتیٛا سؽاسی، اومۊری، سامونکاری، کسم ۉ کار، رٱهزیشتی د جا ڤ جا کاری رٱهزیشتی مێنجا زایاراٛیی ئٱ.

چٱنتا کٱلٱمٱ اْنڳلٛیسی ڤا هومبٱراڤٱر لٛۏری House=مالگٱ،هونٱ Room=تۉ Sparrow=ملٛیچٱک After Noon=اؽڤارٱ Yellow=هیلٛ Red=سۏر Black=سؽ Eye=تیٱ،چٱش Nose=پت،نفت Foot=قولٛ،لٛنڳ Crazy=لٛؽڤٱ،شؽت Stupid=چاٛل